துவேஷம்

துவேசத்தின் மழையின் நனையும்
எனதன்பின் நட்புகள்
சறுக்கிய இடங்களையே
கவனமாய் சேகரிக்கிறார்கள்

எழுதி வைத்தவைகளில்
சாதகமானவைகள் மட்டும்
அவரால் படிக்கப்படுகிறது
தவறாமலொரு அறிவிப்பு
என் முகவரிக்கு

நண்பர்களாய் இருந்தார்களென்று
கடந்ததில் சொல்வதில்
இரண்டு பக்கமிருக்கிறது

மகிழ்வின் கணங்களை மறுபடி ஓட்டிப்பார்ப்பது
அதன்பின்
இழைக்கப்பட்டதை நினைத்து வருந்துவது

இரண்டும் நடக்குமெனினும்
முதலாவதையே
முழுதாய் விரும்புகின்றேன்

பேரன்பில் மூழ்கிப் பயணிக்கும்
மீனாய் இருந்துவிட்டுப் போயேன்
நதியின் மீது நட்புக் கொண்டதாய்
சொல்லிக் கொண்டு
ஏன்
வலைவிரித்துக் காத்திருக்கிறாய்?
மிதப்பவைகளை வைத்துக்கொண்டு
என்ன செய்துவிடுவாய்
கரை சேரும் படகின் நகர்வே
மிஞ்சிக் கிடக்கும் நட்பின் தயவால் தான்...