பிரமீடுக்குள் உறங்கும் பதில்கள்

கேள்விக்குறிகளாலொரு பிரமீடமைத்து 
உள்ளே பிரபஞ்சத்தின் பதில்களை 
உறங்கச் செய்திருக்கிறேன் 

ஐந்து 
நான்கு 
மூன்றென 
இறங்கு வரிசை 
இடுக்குப் புள்ளிகளில் 
ஒன்று உச்சத்திலிருக்கிறது 

மூலிகைச் சாற்றில் 
வளர்ந்தபடியிருக்கிறது 
பதில்களின் நகங்கள் 

பதப்படுத்தப்பட்ட 
மம்மிகளுக்குண்டான கரிசனத்தோடே 
முப்புறமும் சூழப்பட்டிருக்கிறது 
அப்பதில்கள் 

அதன் பக்கத்தில் புதைக்கப்பட்டிருக்கும் 
ஆபரணங்களுக்காக 
எவனேனுமொருவன் நாளை 
துயிலெழுப்பலாம் மரணித்தவற்றை... 

பூர்வ ஜென்ம ஞாபகத்தில் 
பேராசைச் சிதைவுகளில் 
முளைவிடும் விதைகளுக்கு 
உரமாகியிருக்குமந்த
கேள்விகளைத் தேடத்துவங்கலாம் 

மீண்டுமொரு துவக்கம் 
அழிவுகளிலிருந்து...