விக்கல்

உச்சந்தலையின் மயிரெடுத்து
சுண்டி விடுகிறாள்
கத்தியெடுத்து கழுத்தில் வைக்கிறாள்
சத்தமாய் அதட்டுகிறாள்
தண்ணீர் தருகிறாள்
தலையை நிமிர்த்தி
அண்ணாந்து பார்க்கப் பணிக்கிறாள்
அறுபது நொடி
அவஸ்தைக்குப் பின்
ஆசுவாசமாய் அடங்கிப் போகிறது
விக்கல்
பார்வை தெளிய
அவளைப் பார்க்கிறேன்
தளும்பிய கண்ணோடு
இன்னும் என்னையே பார்த்துக் கொண்டு ...
சீண்டாமல் கிடக்கிறது
தட்டில் பரிமாறிய உணவு