வெளிச்சம் போர்த்தாத இரவுகள்

திரியோடு உனக்கென்ன சம்பந்தம்?
உடன் எரியும் அளவுக்கு!
விளக்கோடு விளையாடும்
விட்டில் பூச்சி!

மிருகம் மாறி மனிதன் ஆனதாய்...
பின் எப்படி,
ஒரு கொசுவின் சீண்டலில்
சட்டென சாத்தான் பிரவேசம்?
ஓ! உன் பலம் எப்போதும்
இளைத்தவனிடத்தில் மட்டும்!

இருள் இரவின் அழகு!
நிலவொளியில் பூமி
வார்த்தைக்கு எட்டாத சோபிதம்!
வெளிச்சம் போர்த்தாத
நகரத்து இரவுகள்
மின்வெட்டு உபயத்தில்!

அய்யோ! அது என்ன?
ஒரு விண்மீன் தற்கொலை!
படபடப்பை போக்க
'பச்சை மரத்தைப் பார்'
தோழி சொன்னாள்!
விழுந்ததின் தடம் எப்படியிருக்கும்
விபரீத மூளையில் வானாராய்ச்சி!

தூக்கத்தோடு துக்கத்தின்
சாயலும் அறவே அகன்றது
மேகத்தின் பூந்துவலை துவட்டலில்
நாணமுறும் பெண்மகவாய்
வெண்ணிலவை பார்க்குகையில்.....

மின்பொறிக்குள் அடங்காத
இயற்கையின் ஆளுமை!
தென்றலாய்,இருளாய்,
த‌ண்ணொளியாய்...
சொகுசான வாழ்க்கை
இதுவரை
தொலைத்தது இயற்கை
நிரம்பிய வாழ்க்கை எனப்பட்டது
சில்வண்டுகளின் ரீங்காரத்தோடு
மின்மினிப் பூச்சிகளின்
ஊர்வலத்தை காணும் போதில்!