கடவுளின் குழந்தை

சாத்தான்களும் பிடாரிகளும்
சகஜமாய் புழங்கும் கானகத்தில்
குழந்தையொன்று மந்திரகவசத்தோடும்
உருவேற்றப்பட்ட தாயத்துக்களோடும்
களமிறக்கப்பட்டது கடவுளின் பெயரால்...

ஆபத்துக்களில் மனந்தளராவண்ணம்
அசரீரிகளின் வழி நம்பிக்கைச்சுடர்
எப்போதும் இறக்கைகள் முளைத்த
தேவதைகள் குறித்தே ஓதப்பட்டிருந்தன

சாத்தான்களின் பாசறையை
கடவுளின் அரண்மனையாய்
மாற்றுவதாய் ஏற்பாடு!

ஈட்டிகள் துளைக்கையிலும்
மரண அவஸ்தை உச்சத்திலும்
உதவி வேண்டி குழந்தையின் கதறல்
விண்ணைப் பிளந்தும்
தேவதைகள் வரவேயில்லை!

பார்த்தது குழந்தை!
இவ்விடம் வாழ இன்னது ஏற்பு
பகுத்தறிந்து பாந்தமாய் உறவாடியது

இப்போது கடவுளை வரவேற்க
குழந்தை தயார்
ஒரு காட்டேரியின் மடியில்
குருதியை சுவைத்தபடி!