அவர்கள் என்னை அதிகம் புகழ்கிறார்கள்

அவர்கள் என்னை அதிகம் புகழ்கிறார்கள்
கூச்சத்தில் நெளிந்தாலும்
அவஸ்தயாய் கையமர்த்தினாலும்
ஓய்ந்தபாடில்லை

அவர்களின் முகஸ்துதிகள் முட்கிரீடம்
சிரசேறும் உன்னதப் பொழுதில்
ஏதோ நெருடுகிறது

நீண்ட உரைக்கு முத்தாய்ப்பாய்
வெக்கத்தோடானவொரு போலிச் சிரிப்பு
என்னாலான பங்களிப்பு
என்னையும் நடிக்க வைத்துவிடுகிறார்கள்

ஆமோதிப்புகள் அறை நிறைக்கையில்
அல்லையதிர பெரும் அலை
மாயையைச் சுருட்டிக் கொண்டோடுகிறது

அவர்கள் என்னை அதிகம் புகழ்கிறார்கள்
அதனாலே எனக்கு அதிகம் பயமாயிருக்கிறது